ಸಂಸ್ಕಾರ ಮಾನವನ ಔನ್ನತ್ಯದ ಅಡಿಪಾಯ….

Shyamala Nagesh May 19, 2023 Leave a comment

ಸಂಸ್ಕಾರದಲ್ಲಿ ಎರಡು ರೀತಿಯ ಸಂಸ್ಕಾರವನ್ನು ಕಾಣಬಹುದು . ಒಂದು ಹಿಂದೂ ಧರ್ಮದಲ್ಲಿ ಬರುವ ನಾಮಕರಣ , ಅನ್ನಪ್ರಾಶನ , ಉಪನಯನ , ಕನ್ಯಾ ಸಂಸ್ಕಾರ, ವಿವಾಹ , ಇತ್ಯಾದಿ. ಇನ್ನೊಂದು
ಸತ್ಯ , ಧರ್ಮ, ನೀತಿ , ಕರುಣೆ, ಶಾಂತಿ,ನಂಬಿಕೆ , ಸ್ನೇಹ, ತ್ಯಾಗ, ಆಚಾರ ಇವು ಜಾತಿ , ಧರ್ಮ, ಅಂತಸ್ತುಗಳ ಮೀರಿದ ಭಾರತೀಯ ಪರಂಪರೆಯ ಶ್ರೇಷ್ಠ ಸಂಸ್ಕೃತಿಯೆನ್ನಬಹುದು . ಸಂಸ್ಕಾರವೆನ್ನುವುದು ಮಗುವಿಗೆ ತಾಯಿಯ ಗರ್ಭದಲ್ಲಿಂದಲೇ ಪ್ರಾರಂಭವಾಗುವ ಕ್ರಿಯೆ. ಮಹಾಭಾರತದಲ್ಲಿ ಶ್ರೀಕೃಷ್ಣನು ಚಕ್ರವ್ಯೂಹವನ್ನು ಬೇಧಿಸುವ ರೀತಿಯನ್ನು ಉತ್ತರೆಗೆ ಅರುಹುತ್ತಿರುವಾಗ
ಉತ್ತರೆಯ ಗರ್ಭದಲ್ಲಿರುವ ಅಭಿಮನ್ಯುವು ಅದನ್ನು ಆಲಿಸಿ ಅದಕ್ಕೆ ಸ್ಪಂದಿಸಿದ ರೀತಿಯೇ ಇದಕ್ಕೆ ನಿದರ್ಶನ.

ಇದು ಕೇವಲ ವಿದ್ಯೆಯಿಂದಲೋ , ಮಕ್ಕಳುಪಡೆದುಕೊಳ್ಳುವ ಅಂಕಗಳಿಂದಲೋ ಬರುವಂಥದ್ದಲ್ಲ.ವಿದ್ಯೆಯ ಜೊತೆಗೆ ಸಂಸ್ಕಾರ ಸೇರಿರಲು ಹಾಲು ಜೇನು ಬೆರೆತಂತೆ.
ಬುದ್ಧಿ ಬಲಿಯುತ್ತಿರುವ ಮಗುವಿಗೆ ಸಮಾಧಾನದಿಂದ ಸರಿತಪ್ಪುಗಳ ಕಲ್ಪನೆ ನೀಡಿ ಅದರ ಅರಿವು ಮೂಡಿಸುವಲ್ಲಿ ಪಾಲಕರ ಮತ್ತು ಶಿಕ್ಷಕರ ಪಾತ್ರ ಬಹಳ ಮಹತ್ವದ್ದು. ಈ ಸಂದರ್ಭದಲ್ಲಿ ತನ್ನದೆಂಬ ವ್ಯಾಮೋಹವನ್ನು ತೊರೆದು ತಪ್ಪನ್ನು ನಿರ್ದಾಕ್ಷಿಣ್ಯವಾಗಿ ಖಂಡಿಸುವುದರಿಂದ ಮಕ್ಕಳು ಸರಿಯಾದ ದಾರಿಯಲ್ಲಿ ನಡೆಯಲು ಸಾಧ್ಯವಾಗುತ್ತದೆ.

ಸುಳ್ಳು ಮಾನವನ ಆತ್ಮಸ್ಥೈರ್ಯವನ್ನು ಕೊಲ್ಲುತ್ತದೆ. ಸತ್ಯವಂತರಿಗೆ ನಾಲ್ಕಾರು ಬಾರಿ ಕಷ್ಟಗಳು ಎದುರಾದರೂ ಕೊನೆಯಲ್ಲಿ ಜಯ ಸತ್ಯಕ್ಕೇ.ಸಂಸ್ಕಾರವಂತ ಮನುಷ್ಯ ಎಷ್ಟೇಸಿರಿವಂತನಾಗಿರಲಿ , ಉನ್ನತ
ಹುದ್ದೆಯಲ್ಲಿರಲಿ ಅಥವಾ ಕಡುಬಡವನೇ ಆಗಿರಲಿ ಅವನನ್ನು ಸಮಾಜ ನೋಡುವ ದೃಷ್ಟಿಕೋನ ,ಗೌರವಿಸುವ ರೀತಿಯೇ ಭಿನ್ನ. ಯಾರಿಗೆ ಉತ್ತಮ ಸಂಸ್ಕಾರವಿದೆಯೋ ಅವರು ಸಮಾಜಕ್ಕೆ ಸದಾಕಾಲ ಮಾದರಿಯಾಗಿರುತ್ತಾರೆ.

ನಾಮದ ಬಲವೊಂದಿದ್ದರೆ ಸಾಕೊ ಎಂಬಂತೆ ಸಂಸ್ಕಾರದ ಬಲ ಮನುಷ್ಯನನ್ನು ಪರಿಪೂರ್ಣತೆಯತ್ತ ಕೊಂಡೊಯ್ಯುತ್ತದೆ . ಆಕಾರವಿಲ್ಲ , ಬಣ್ಣವಿಲ್ಲ , ವಾಸನೆಯಿಲ್ಲ , ರೂಪವಿಲ್ಲದ ಇದಕ್ಕೆ ಆಂತರಿಕ ಸೊಬಗೇ ಹೊರತು ಆಡಂಬರದ್ದಲ್ಲ.
ರಾಮಾಯಣದಲ್ಲಿ ರಾವಣ , ಮಹಾಭಾರತದಲ್ಲಿ ದುರ್ಯೋಧನ ಎಷ್ಟೇ ಪರಾಕ್ರಮಿಗಳೇ , ಅಧ್ಯಯನಶೀಲರೇ ಆಗಿರಲಿ ರಾಮಕೃಷ್ಣರಿಗೆ ಲಭಿಸಿದ ಮಾನ್ಯತೆ ಶ್ರೇಯಸ್ಸು ಅವರಿಗೆ ದೊರೆಲಿಲ್ಲ.

ಗುರು ಹಿರಿಯರಲ್ಲಿ
ವಿಧೇಯತೆಯಿಂದಿರುವುದು,ಅಶಕ್ತರಲ್ಲಿ ,ಅಂಗವಿಕಲರಲ್ಲಿ ಕರುಣೆ , ನಯವಿನಯದ ನಡೆನುಡಿ, ಕಷ್ಟದಲ್ಲಿರುವವರಿಗೆ ನಮ್ಮ ಕೈಲಾದ ಸಹಾಯ ಮಾಡುವುದುದು , ಸುಳ್ಳು ವಂಚನೆಮಾಡದೇ ಅತಿ ಆಸೆಯನ್ನು ತೊರೆದು ನಡೆಯುವುದು , ಅಧಿಕಾರ , ಹಣ , ಪ್ರತಿಷ್ಟೆಗೆ ಹಾತೊರೆಯದೇ ಇದ್ದುದರಲ್ಲೇ ಸಂತೃಪ್ತಿ ಯನ್ನು ಕಾಣುವುದು , ಪರರನ್ನು ನಿಂದಿಸದಿರುವುದು , ಅನ್ಯರ ಹಿತವನ್ನು ಕಂಡು ಅಸೂಯೆ ಪಡದಿರುವುದು, ಪ್ರತಿಫಲಾಪೇಕ್ಷೆ ಇಲ್ಲದ ಪರೋಪಕಾರ ಇವೆಲ್ಲ ಚಿಕ್ಕ ಚಿಕ್ಕ ವಿಷಯವಾಗಿ ಕಾಣಬಹುದು ಆದರೆ ಈ ಗುಣಗಳೇ ಮಾನವನನ್ನು ಅತೀ ಎತ್ತರಕ್ಕೆ ಕೊಂಡೊಯ್ಯುವಲ್ಲಿ ಸಂಸ್ಕಾರ ಮಾಡುವ ಪಾತ್ರಗಳು