Prathidvani Yellapura
Related Articles
ಗ್ರಾಮದೇವಿ ಅನುಗ್ರಹದಲ್ಲಿ ಶ್ಯಾಮಲಾ ನಾಗೇಶ್ ಲೇಖನಿಯಲ್ಲಿ ಪ್ರತಿಧ್ವನಿ ಯಲ್ಲಾಪುರ
ಯಲ್ಲಾಪುರ : ಸುಧೀರ್ಘ 40 ವರ್ಷಗಳ ಶಿಕ್ಷಕ ವೃತ್ತಿಯಿಂದ ನಿವೃತ್ತಿ ಹೊಂದುತ್ತಿರುವ ಸಂತೋಷ ಹೊನ್ನಪ್ಪ ಕೊಳಗೇರಿ ಹುಟ್ಟಿದ್ದು ಕುಮಟಾ ತಾಲೂಕಿನ ಹನೇಹಳ್ಳಿಯ ಬಡಕುಟುಂಬದಲ್ಲಿ. ಶ್ರೀಮಂತಿಕೆ ಇಲ್ಲದಿದ್ದರೂ ಜ್ಞಾನ ಸಂಪತ್ತಿನಲ್ಲಿ ಆಗರ್ಭ ಶ್ರೀಮಂತರು. ಅಜಾತಶತ್ರು, ಸರ್ವರನ್ನೂ ಅತ್ಯಾಪ್ತರಾಗಿ ಕಂಡು ಶಿಕ್ಷಣ ವಲಯವಲ್ಲದೇ ಸಾಮಾಜಿಕ , ಧಾರ್ಮಿಕ, ಸಾಂಸ್ಕೃತಿಕ ಕ್ಷೇತ್ರಗಳಲ್ಲೂ ಸೇವೆ ಸಲ್ಲಿಸಿ ಜನಮಾನಸದಲ್ಲಿ ತಮ್ಮದೇ ಛಾಪನ್ನು ಮೂಡಿಸಿದ್ದಾರೆ.
1985ರಲ್ಲಿ ಶಿಕ್ಷಣ ಇಲಾಖೆಯಲ್ಲಿ ಶಿಕ್ಷಕರಾಗಿ ಪಾದಾರ್ಪಣೆ ಮಾಡಿ ಜೋಯಿಡಾ ತಾಲೂಕಿನಿಂದ ವೃತ್ತಿಜೀವನ ಪ್ರಾರಂಭಿಸಿದರು. 05 ವರ್ಷಗಳ ನಂತರ ಯಲ್ಲಾಪುರ ತಾಲೂಕಿಗೆ ಆಗಮಿಸಿದ ಸಂತೋಷ ಕೊಳಗೇರಿ 1991 ರಲ್ಲಿ ತಾಲೂಕಿನ ವಜ್ರಳ್ಳಿಯಲ್ಲಿ 08ವರ್ಷಗಳ ಸೇವೆ ಸಲ್ಲಿಸಿದರು. ನಂತರ 1999ರಲ್ಲಿ ಇಡಗುಂದಿಯ ಚಿನ್ನಾಪುರದ ಶಾಲೆಗೆ ವರ್ಗಾವಣೆಗೊಂಡು 16ವರ್ಷ ಸುಧೀರ್ಘ ಸೇವೆ ಸಲ್ಲಿಸಿ ಚಿನ್ನಾಪುರ ಜನತೆಯ ಮನೆಮಗನಂತಾದರು. ನಂತರ 2015ರಲ್ಲಿ ಪದೋನ್ನತಿ ಹೊಂದಿ ಮುಖ್ಯೋಪಾಧ್ಯಾಯರಾಗಿ ಮಲವಳ್ಳಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಗೆ ವರ್ಗಾವಣೆಗೊಂಡು ಸತತ 9 ವರ್ಷಗಳ ಕಾಲ ವೃತ್ತಿ ನಿರ್ವಹಿಸಿ ಮಕ್ಕಳ, ಜನತೆಯ ಪ್ರೀತಿಗಳಿಸಿ ಇಂದು ನಿವೃತ್ತಿ ಹೊಂದುತ್ತಿದ್ದು ಸ.ಹಿ.ಪ್ರಾ.ಶಾಲೆ ಮಲವಳ್ಳಿ ಹಾಗೂ ರಾಮಲಿಂಗ ದೇವಸ್ಥಾನ ಯುವಕ ಮಂಡಳ ಉತ್ಸವ ಸಮಿತಿಯವರ ಸಂಯುಕ್ತಾಶ್ರಯದಲ್ಲಿ ಬೀಳ್ಕೊಡುಗೆ ಸಮಾರಂಭ ಏರ್ಪಡಿಸಲಾಗಿದೆ.
ಸಂತೋಷ ಕೊಳಗೇರಿ ಯವರು ಎಂದಿಗು ಪ್ರಶಸ್ತಿ ಪುರಸ್ಕಾರ ದ ಹಿಂದೆ ಬಿದ್ದವರಲ್ಲ ಹಾಗೆಂದು ಗೌರವದಿಂದ ಅರಸಿ ಬಂದ ಪುರಸ್ಕಾರವನ್ನು ತಿರಸ್ಕರಿಸಲು ಇಲ್ಲ. ತಾಲೂಕು ಉತ್ತಮ ಶಿಕ್ಷಕ, ಜಿಲ್ಲಾ ಉತ್ತಮ ಶಿಕ್ಷಕ ಪ್ರಶಸ್ತಿ ಸೇರಿದಂತೆ ಹತ್ತು ಹಲವು ಪ್ರಶಸ್ತಿ, ಸಮ್ಮಾನಗಳು ಅರಸಿ ಬಂದಿವೆ. ಕ್ರೀಡೆಯಲ್ಲಿ ಹೆಚ್ಚು ಆಸಕ್ತಿ ಹೊಂದಿದ್ದು ಕ್ರಿಕೆಟ್ ಅವರ ಅಚ್ಚುಮೆಚ್ಚಿನ ಆಟವಾಗಿದೆ. ಸಂಘಟನಾ ಶಿಲ್ಪಿ ಎಂದರೆ ತಪ್ಪಾಗಲಾರದು. ಸಾಮಾಜಿಕ, ಸಾಂಸ್ಕೃತಿಕ, ಧಾರ್ಮಿಕ, ನಾಟಕರಂಗಗಳಲ್ಲಿ ಮಿಂಚಿದವರು ನೂರಾರು ಪ್ರತಿಭೆಗಳನ್ನು ಬೆಳಕಿಗೆ ತಂದವರು. ರಂಗಕಲೆಯಲ್ಲಿ ನಿಷ್ಣಾತರಾಗಿ ನಾಟಕಗಳಲ್ಲಿ ನಟಿಸಿ ನಿರೂಪಕರಾಗಿ ಕಾರ್ಯನಿರ್ವಹಿಸಿ ಹೆಸರಾದವರು. ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷರಾಗಿ ಮಂಡಲ ಸಾಕ್ಷರತಾ ಸಮನ್ವಯಾಧಿಕಾರಿಯಾಗಿ ಸೇವೆ ಸಲ್ಲಿಸಿ ನೌಕರರ ಸಂಘದ ಜಿಲ್ಲಾ ಉಪಾಧ್ಯಕ್ಷರಾಗಿದ್ದೂ ಅಲ್ಲದೇ ಯಲ್ಲಾಪುರದಲ್ಲಿ ನೌಕರರ ಸಂಘದ ಕಟ್ಟಡ ನಿರ್ಮಾಣದಲ್ಲಿ ಅವಿರತವಾಗಿ ಶ್ರಮಿಸಿ ನೌಕರ ಸಂಘಕ್ಕೊಂದು ನೆಲೆ ತಂದುಕೊಟ್ಟವರು ಸಂತೋಷ ಹೊನ್ನಪ್ಪ ಕೊಳಗೇರಿಯವರು.
ಶಿಕ್ಷಕ ಸಮಾಜದ ಶಿಲ್ಪಿಯಾಗಿ ತಿದ್ದಿ ತೀಡುವವರು, ಸರಿದಾರಿಯಲ್ಲಿ ನಡೆದು ಸಾತ್ವಿಕ ನಡೆಯೊಂದಿಗೆ ಸಮಾಜಮುಖಿ ಚಿಂತಕರಾಗಿ ವಿದ್ಯಾ ದೇಗುಲದಲ್ಲಿ ಶಿಕ್ಷಕರಾಗಿ ಸೇವೆ ಸಲ್ಲಿಸುತ್ತಾ ವಿದ್ಯಾ ಬ್ರಹ್ಮನಿಗೆ ಅಕ್ಷರ ಪೂಜೆ ಸಲ್ಲಿಸಿ 40 ವರ್ಷದ ಸುಧೀರ್ಘ ಸಾರ್ಥಕ ಸೇವೆಗೆ ವಿದಾಯ ಹೇಳಿ ವೃತ್ತಿಯಿಂದ ನಿವೃತ್ತಿಯಾಗಿ ಪ್ರವೃತ್ತಿಯೆಡೆಗೆ ಸಾಗುತ್ತಿರುವ ಸಂತೋಷ ಹೊನ್ನಪ್ಪ ಕೊಳಗೇರಿಯವರ ಜೀವನ ಇತರರಿಗೂ ಆದರ್ಶ, ಕಲಿತ ಸಹಸ್ರಾರು ವಿದ್ಯಾರ್ಥಿಗಳಿಗೆ ಮಾರ್ಗದರ್ಶ. ಪತ್ನಿ ಸುಚೇತಾ ಮಿರಾಶಿ ಬೆನ್ನೆಲುಬಾಗಿ ನಿಂತು ತಾವೂ ಶಿಕ್ಷಕಿಯಾಗಿ ಸೇವೆ ಸಲ್ಲಿಸುತ್ತಾ ಪತಿಯ ಸಾತ್ವಿಕ ಬದುಕಿನೊಂದಿಗೆ ಬಾಳ ಸಂಗಾತಿಯಾಗಿ ಹೆಜ್ಜೆ ಹಾಕುತ್ತಿದ್ದಾರೆ. ಅವರ ಭವಿಷ್ಯದ ಬದುಕು ಹಸನಾಗಿರಲೆಂಬುದು ಸಹಸ್ರಾರು ವಿದ್ಯಾರ್ಥಿಗಳ, ಪೋಷಕರ,ಇಲಾಖೆ ಪ್ರಮುಖರ ಆಶಯವಾಗಿದೆ.
